今日成智來了探我地~~咁都係去番去開果間酒樓飲茶~之後佢提議去踩單車, 都係一個新鮮而又幾好既提議~我仲以為又係好似以前咁去唱一個TEA K而已添......加上今日天氣很好, 整日陽光燦爛也很和暖~真的有點像已踏入夏天的階段~本來想叫埋彥菜出黎踩, 不過估唔到平時好動既佢唔識踩單車同游水......大跌眼鏡......咁我同向裕同佢就入左沙田, 第一次租沙田公園近瀝源橋果檔單車舖既車, 成半年冇踩過車了, 也好耐冇在假日踩車, 今日真係多人到飛起......我地沿城河東再過番橋入大埔, 吐露港果段又係例牌多人, 有D窄既路段要就位, 唔係好多地方可以踩得快, 成日都要爬人頭先可以叫做快少少......慢少少後面班人又有時剎唔切掣撞到或炒埋一碟, 今日在路上已見到4-5單炒埋一碟事件......最後我地踩到去大埔墟街市, 上左去食左個粉當下午茶先踩返沙田~~不過今次事後又唔覺很累同''發軟蹄"~~晚上又係一切食埋飯佢先返去~~

不過每次成智黎到無論食咩都要同我爸媽爭請客, 因為佢覺得唔好意思好似黎痴餐咁, 加上冇乜請過我屋企食野, 不過每次都係我屋企勝......我屋企就話大家都係自己人唔駛計較咁話~~我爸媽真的非常客氣, 我地同佢出去玩既時候佢就會請番我地, 不過每次我阿媽都會塞張金牛俾我叫我出去玩就用果張金牛俾錢, 唔好要成智俾錢......每次我都是做左磨心, 我又細過成智, 又唔係爸媽既性格......雖然話去飲飲食食去玩時都會話我阿媽俾左錢我不如用果D錢算數......但成智每次都是叫我地收番埋俾番阿媽......我又唔會好似爸媽咁響度爭咁樣衰......返到屋企時就廢事茶煲就話都同過成智爭俾錢但爭唔勝佢, 咁先搞得掂, 否則阿媽又響度嘈嘛......不過這些事通通也使我想起中五時學既"請客"......呢D都唔知係中國人既美德定係惡習了......